હડિયોલ શાળામાં ગણિત-વિજ્ઞાન પ્રદર્શન યોજાયું:400થી વધુ વિદ્યાર્થીઓએ 200થી વધુ કૃતિઓ રજૂ કરી, સતત બીજા વર્ષે આયોજન

હિંમતનગર તાલુકાના હડિયોલ ગામની પીએમશ્રી-ગુજરાત પ્રાથમિક શાળામાં શાળા કક્ષાનું ગણિત, વિજ્ઞાન અને પર્યાવરણ પ્રદર્શન-2026 યોજાયું હતું. આ પ્રદર્શનમાં 400થી વધુ વિદ્યાર્થીઓએ ભાગ લીધો હતો. તેમણે 200થી વધુ વિવિધ કૃતિઓ, પ્રયોગો અને વર્કિંગ મોડેલ્સ રજૂ કર્યા હતા. શાળાના 11 રૂમમાં આ કૃતિઓનું પ્રદર્શન કરવામાં આવ્યું હતું. આ પ્રદર્શન જોવા માટે વાલીઓ, એસએમસીના સભ્યો અને ગ્રામજનો હાજર રહ્યા હતા. તેમણે વિદ્યાર્થીઓની કૃતિઓ જોઈને તેમનો ઉત્સાહ વધાર્યો હતો. બાળવાટિકાથી ધોરણ-8 સુધીના વિદ્યાર્થીઓએ પર્યાવરણ સુરક્ષા, સૌર ઊર્જા, રોબોટિક્સ, નવીનતા અને ગણિત-વિજ્ઞાનના અલગ અલગ વિષયો પર પ્રોજેક્ટ્સ બનાવ્યા હતા. શાળાના મુખ્ય શિક્ષક મયુરભાઈ પટેલે જણાવ્યું કે, શાળામાં સતત બીજા વર્ષે ગણિત-વિજ્ઞાન પ્રદર્શનનું આયોજન થયું છે. ગયા વર્ષે વિદ્યાર્થીઓએ લગભગ 160 કૃતિઓ રજૂ કરી હતી. આ વર્ષે તેમાં વધારો થયો છે અને 200થી વધુ કૃતિઓ રજૂ કરવામાં આવી છે. શાળામાં બાળવાટિકાથી ધોરણ-8 સુધી કુલ 600 વિદ્યાર્થીઓ અને 18 શિક્ષકો છે. તેમણે વધુમાં કહ્યું કે, પ્રદર્શનનો મુખ્ય હેતુ વિદ્યાર્થીઓમાં ગોખણપટ્ટી દૂર કરીને વૈજ્ઞાનિક દૃષ્ટિકોણ અને તાર્કિક વિચારસરણી વિકસાવવાનો છે. વિદ્યાર્થીઓને ફક્ત પુસ્તકીય જ્ઞાન પૂરતું સીમિત ન રાખીને તેમને આધુનિક ટેક્નોલોજી અને નવા વિચારો સાથે જોડવાનો પ્રયાસ થઈ રહ્યો છે.