MG હોસ્ટેલની દાળમાંથી જીવાત નીકળી:રાજકોટમાં 250થી વધુ વિદ્યાર્થીઓ જમ્યા વિના ધરણા, લાઈટમાંથી ઉડતા જીવડા પડ્યાનો અધિકારીનો લુલો બચાવ

રાજકોટના કાલાવડ રોડ પર આવેલી સમાજ કલ્યાણ વિભાગ દ્વારા સંચાલિત મહાત્મા ગાંધી (એમ.જી.) કુમાર છાત્રાલયમાં ભોજનની કથળતી ગુણવત્તાને લઈને ફરી એકવાર વિવાદ સર્જાયો છે. હોસ્ટેલમાં આપવામાં આવતાં ભોજનમાંથી વારંવાર જીવડાં નીકળવાની ઘટનાઓને પગલે વિદ્યાર્થીઓમાં ભારે રોષ વ્યાપી ગયો છે. આજે પીરસવામાં આવેલી દાળમાંથી પણ 3 જેટલા જીવડા નીકળતાં જ કંટાળેલા વિદ્યાર્થીઓએ ભોજનનો બહિષ્કાર કર્યો હતો અને હોસ્ટેલ પરિસરમાં જ હડતાલ પર ઉતરી ગયા હતા. આ ઘટનાને પગલે દોડી આવેલા અધિકારીએ લાઈટમાંથી ઉડતા જીવડા પડ્યાનો લુલો બચાવ કર્યો હતો. અને ખાદ્ય પદાર્થોની ગુણવત્તા ચકાસી બેદરકારી સામે આવે તો કડક કાર્યવાહીની ખાતરી પણ આપી હતી. 'વારંવાર નબળી ગુણવત્તા અને જીવડાંવાળું ભોજન પીરસવામાં આવે છે' વિરોધ પ્રદર્શનમાં NSUIના પ્રદેશ પ્રમુખ નરેન્દ્ર સોલંકી પણ વિદ્યાર્થીઓ સાથે જોડાયા હતા. તેમણે તંત્ર અને સંચાલકો સામે ગંભીર આક્ષેપો કરતાં જણાવ્યું હતું કે, આ છાત્રાલયમાં સૌરાષ્ટ્રના વિવિધ વિસ્તારોમાંથી આવેલા 300થી વધુ વિદ્યાર્થીઓ રહીને અભ્યાસ કરે છે. પરંતુ તેમને વારંવાર નબળી ગુણવત્તા અને જીવડાંવાળું ભોજન પીરસવામાં આવે છે. છેલ્લા 1 અઠવાડિયાથી વિદ્યાર્થીઓ આ અંગે સતત રજૂઆતો કરી રહ્યા હોવા છતાં તંત્ર દ્વારા કોઈ નક્કર પગલાં લેવામાં આવ્યા નથી. વિદ્યાર્થીઓના આરોગ્ય સાથે ખીલવાડનો આક્ષેપ તેમણે આક્ષેપ કર્યો કે હોસ્ટેલમાં મુખ્યત્વે અનુસૂચિત જાતિના વિદ્યાર્થીઓ રહેતા હોવાથી અધિકારીઓ અને કોન્ટ્રાક્ટરની મિલીભગત અને જાતિવાદી માનસિકતાના કારણે વિદ્યાર્થીઓના આરોગ્ય સાથે ખીલવાડ કરવામાં આવી રહ્યો છે. સરકાર દ્વારા ભોજન માટે પૂરતું બજેટ અને કોન્ટ્રાક્ટ આપવામાં આવતો હોવા છતાં ભ્રષ્ટાચારના કારણે વિદ્યાર્થીઓને હલકી કક્ષાનું ભોજન આપવામાં આવે છે. કોન્ટ્રાક્ટ તાત્કાલિક રદ કરવા સહિતની માગ સાથે વિદ્યાર્થીઓના ધરણા આજે રાત્રે 250થી વધુ વિદ્યાર્થીઓ ભોજન કર્યા વિના છેલ્લા 3 કલાકથી વધુ સમયથી ધરણા પર બેઠા છે. સ્થાનિક તંત્રના અધિકારીઓ ઘટનાસ્થળે પહોંચ્યા હતા પરંતુ તેઓ વિદ્યાર્થીઓને મળવાને બદલે સીસીટીવી કેમેરા ચકાસીને વિદ્યાર્થીઓએ પોતે જીવડાં નાખ્યા હોવાનો દોષારોપણ કરવાનો પ્રયાસ કરી રહ્યા છે. ત્યારે અમારી માંગ છે કે બેદરકાર કોન્ટ્રાક્ટરનો કોન્ટ્રાક્ટ તાત્કાલિક રદ કરવામાં આવે અને નવેસરથી સારી ગુણવત્તાવાળું ભોજન પૂરું પાડી શકે તેવા એજન્સીને જવાબદારી સોંપવામાં આવે. જો આ બાબતે યોગ્ય ઉકેલ નહીં લાવવામાં આવે તો આગામી દિવસોમાં માત્ર રાજકોટ નહીં ગુજરાતભરમાં ઉગ્ર આંદોલન કરવાની ચેતવણી તેમણે આપી છે. લાઈટમાંથી ઉડતા જીવડા પડ્યાનો લુલો બચાવ આ અંગેની જાણ થતાં નાયબ નિયામક, અનુસૂચિત જાતિ કલ્યાણ એ.જે. ખાચર દોડી આવ્યા હતા. અને જણાવ્યું હતું કે, છાત્રો દ્વારા દાળ અને જમવામાંથી જીવાત નીકળવાની રજૂઆત મળતાં મેં પોતે જ કોઠાર રૂમમાં જઈને દાળ બહાર કાઢીને તપાસ કરી હતી. આ તપાસ દરમિયાન દાળમાં કોઈ જીવાત મળી આવી ન હતી. ચોમાસાના વાતાવરણમાં લાઇટના કારણે ઉડતાં જીવડાં ડિશ પર પડ્યા હોઈ શકે છે. આવી ઘટના ફરી ન બને તે માટે એક્સપર્ટની સલાહ લઈને જરૂરી કાર્યવાહી કરવામાં આવશે. અગાઉ કોઈ વારંવાર રજૂઆતો મળી નહીં હોવાનું જણાવતાં તેમણે ઉમેર્યું કે થોડા દિવસ પહેલાં જ એક રજૂઆત આવી હતી. ભવિષ્યમાં જો અનાજ કે ભોજનની ગુણવત્તા સંબંધિત કોઈ સમસ્યા કે ખામી જણાશે, તો કોન્ટ્રાક્ટર સામે યોગ્ય કાર્યવાહી કરવામાં આવશે.