બીલીમોરા પોલીસે ભાઠા ગામમાંથી ગેરકાયદેસર હથિયાર સાથે એકને પકડ્યો:આરોપી પાસેથી પિસ્તોલ અને રિવોલ્વર મળી, હથિયાર આપનાર વોન્ટેડ

નવસારી જિલ્લાના શહેરી વિસ્તારોની જેમ હવે ગ્રામ્ય વિસ્તારોમાં પણ લોકો હથિયાર રાખવા લાગ્યા છે. ગણદેવી તાલુકાના ભાઠા ગામમાં મજૂરી કરતા એક વ્યક્તિના ઘરેથી બીલીમોરા પોલીસે દેશી બનાવટની પિસ્તોલ સાથે એક આરોપીની ધરપકડ કરી છે. આ હથિયાર આપનાર એક વ્યક્તિને વોન્ટેડ જાહેર કરાયો છે. પોલીસે બીલીમોરાના ભાઠા ઘોડા ફળિયામાં રહેતા જયકિશન ઉર્ફે ચકો મહેશભાઈ કોળી પટેલને ઝડપી પાડ્યો હતો. તેની પાસેથી 30,000 રૂપિયાની એક દેશી બનાવટની પિસ્તોલ અને 25,000 રૂપિયાની એક દેશી રિવોલ્વર મળી આવી હતી. પોલીસે કુલ 55,000 રૂપિયાનો મુદ્દામાલ જપ્ત કર્યો છે. તપાસમાં સામે આવ્યું કે આ હથિયાર સંતાડવા માટે ગણદેવીના ભાઠા ઘોડા ફળિયામાં રહેતા ક્રિશ કલ્પેશભાઈ કોળી પટેલે આપ્યા હતા. પોલીસે ક્રિશને વોન્ટેડ જાહેર કર્યો છે. આ મામલે બીલીમોરા પોલીસ સ્ટેશનમાં આર્મ્સ એક્ટની કલમ અને જી.પી. એક્ટની કલમ 135 મુજબ ગુનો નોંધવામાં આવ્યો છે. પોલીસે આગળની કાયદેસરની કાર્યવાહી શરૂ કરી છે.