વલસાડમાં ગણેશોત્સવ પહેલા શ્રીજીની પ્રતિમાઓનું ભવ્ય આગમન:આઝાદ ચોક DJ, નાસિક ઢોલ અને આતશબાજીથી ગુંજી ઉઠ્યો, ભક્તોની ભારે ભીડ ઉમટી

વલસાડ સહિત ગુજરાત અને મહારાષ્ટ્રમાં ગણેશોત્સવ નજીક આવી રહ્યો છે. ગણેશ મંડળોમાં ઉત્સાહનો માહોલ છે. આયોજકો શ્રીજીની પ્રતિમાઓને મંડળમાં લાવવાની અને સ્થાપનાની તૈયારીઓને અંતિમ ઓપ આપી રહ્યા છે. બુધવારે રાત્રે વલસાડ શહેરના આઝાદ ચોક ખાતે વિવિધ ગણેશ મંડળો દ્વારા શ્રીજીની પ્રતિમાઓનું ભવ્ય આગમન કરવામાં આવ્યું હતું. શ્રીજીની પ્રતિમાઓના આગમન સમયે આઝાદ ચોક સહિત શહેરના મુખ્ય માર્ગો પર ભક્તિ અને ઉત્સાહનો માહોલ છવાઈ ગયો હતો. ગણેશ મંડળોના કાર્યકરો અને ભક્તો બાપ્પાની પ્રતિમાઓને શોભાયાત્રા સ્વરૂપે લાવ્યા હતા. આઝાદ ચોક ખાતે શ્રીજીના મુખ દર્શન કરાવતી વખતે ભવ્ય આતશબાજી કરવામાં આવી હતી, જેનાથી આખો વિસ્તાર રોશનીથી ઝળહળી ઉઠ્યો હતો. મોડી રાત સુધી આઝાદ ચોક ડીજેના તાલ અને નાસિક ઢોલના ધબકારથી ગુંજી ઉઠ્યો હતો. ઢોલના તાલે ગણેશ ભક્તો ઝૂમી ઉઠ્યા હતા. 'ગણપતિ બાપ્પા મોરિયા'ના નાદથી વલસાડ શહેરના મુખ્ય માર્ગો ગુંજી ઉઠ્યા હતા. શ્રીજીના આગમનને લઈને ગણેશ મંડળોના કાર્યકરોમાં પણ ઘણો ઉત્સાહ જોવા મળ્યો હતો. આઝાદ ચોક ખાતે વિવિધ મંડળોના શ્રીજીના આગમન સાથે જ પ્રતિમાઓના દર્શન કરવા મોટી સંખ્યામાં ગણેશ ભક્તો ઉમટી પડ્યા હતા. પરિવાર સાથે આવેલા ભક્તોએ બાપ્પાના દર્શન કરીને આશીર્વાદ લીધા. આગમન દરમિયાન કોઈ અનિચ્છનીય ઘટના ન બને તે માટે વ્યવસ્થા પણ ગોઠવવામાં આવી હતી. ગણેશોત્સવ નજીક આવતા શહેરના વિવિધ વિસ્તારોમાં ગણેશ મંડળો દ્વારા પંડાલ અને ડેકોરેશનની કામગીરીને અંતિમ રૂપ આપવામાં આવી રહ્યું છે. આગામી દિવસોમાં શહેરમાં વધુ ગણેશ મંડળો દ્વારા શ્રીજીની પ્રતિમાઓના આગમન સાથે ગણેશોત્સવનો માહોલ વધુ રંગીન બનવાની શક્યતા છે.