પૂર્વ કર્મચારીઓ દ્વારા છેતરપિંડી:વસ્ત્રાપુરમાં હોસ્પિટલ અને સિંધુભવન રોડ પર કંપનીના કર્મચારીએ પર્સનલ એકાઉન્ટમાં લાખો રૂપિયા ટ્રાન્સફર કર્યા

વસ્ત્રાપુર અને સિંધુભવન રોડ પર આવેલી હોસ્પિટલ તેમજ કંપનીમાં પૂર્વ કર્મચારી દ્વારા લાખો રૂપિયાની છેતરપિંડી આચરવામાં આવી છે. વસ્ત્રાપુરમાં પાર્થ હોસ્પિટલના ફાર્મસીની દુકાનમાં સ્ટોર મેનેજર તરીકે નોકરી કરતા યુવકે દવાના પૈસા પોતાના એકાઉન્ટમાં ટ્રાન્સફર કરાવ્યા હતા, જ્યારે GTPL કંપનીમાં પૂર્વ એકાઉન્ટ મેનેજરે કંપનીના 78.77 લાખ પોતાના પિતાના એકાઉન્ટમાં ટુકડે ટુકડે જમા કરાવ્યા હતા. આ મામલે વસ્ત્રાપુર અને બોડકદેવ પોલીસે ગુનો નોંધી વધુ તપાસ શરૂ કરી છે. પહેલો કિસ્સો વસ્ત્રાપુરમાં પાર્થ હોસ્પિટલમાં ભરત પિઠીયા ફાર્મસીનો સ્ટોર ચલાવે છે. છેલ્લા ત્રણ મહિનાથી આ સ્ટોરમાં હિમાંશુ ગજ્જર મેનેજર તરીકે નોકરી કરતો હતો. હોસ્પિટલના ડોક્ટરને એક દર્દીના સંબંધીએ ફોન કરી અને કહ્યું હતું કે તમારા ફાર્મસી સ્ટોરમાં નોકરી કરતા હિમાંશુ દવાના પૈસા તેમના એકાઉન્ટમાં લે છે અને મારી દવાના પણ પૈસા લીધા છે, જેથી આ બાબતે તેમણે હિમાંશુને ફોન કરીને હોસ્પિટલ બોલાવવામાં આવ્યા હતા. હોસ્પિટલનો ફોન માંગવામાં આવ્યો ત્યારે ફોન તેણે વેચી દીધો હોવાનું કહ્યું હતું. જ્યારે તેના ફોનમાં ગુગલ-પે એપ્લિકેશનની હિસ્ટ્રી તપાસવામાં આવી હતી, ત્યારે છેલ્લા ત્રણેક મહિનામાં 50થી વધુ દર્દીઓના દવાના પૈસા તેના બેંક એકાઉન્ટમાં ટ્રાન્સફર કરાવ્યા હતા. કુલ 1.42 લાખ રૂપિયા બેંક એકાઉન્ટમાં ટ્રાન્સફર કરાવવામાં આવ્યા હોવાનું ધ્યાને આવ્યું હતું. હોસ્પિટલની જાણ બહાર દવાના પૈસા પોતાના એકાઉન્ટમાં નંખાવામાં આવ્યા હતા જેને લઇને આ બાબતે વસ્ત્રાપુર પોલીસ સ્ટેશનમાં ફરિયાદ નોંધાવવામાં આવતા પોલીસે ગુનો નોંધી તપાસ શરૂ કરી છે. બીજો કિસ્સો સિંધુભવન રોડ પર GTPL કંપની આવેલી છે, જેમાં વર્ષ 2023થી 2025 સુધી નરોડા મુરલીધર હાઇટ્સમાં રહેતો રાજકુમાર ગુપ્તા એકાઉન્ટ મેનેજર તરીકે નોકરી કરતો હતો. ડિસેમ્બર 2025માં તેણે નોકરી છોડી દેતા નવા કર્મચારી દ્વારા કામગીરી સંભાળવામાં આવી હતી. માર્ચ 2026ના ઓડિટ દરમિયાન જી આર એન્ટરપ્રાઇઝ નામની કંપનીના બેંક એકાઉન્ટમાં પૈસા ગયા હોવાનું ધ્યાને આવ્યું હતું. જે બાદ કંપનીમાં તપાસ કરવામાં આવતા તેમના બેંક એકાઉન્ટમાં કોઈ પૈસા ગયા નહોતા જેથી આ બાબતે ઊંડાણપૂર્વક તપાસ કરતા ખોટા નામ સાથે બિલો બનાવવામાં આવ્યા હોવાનું ધ્યાને આવ્યું હતું. રાજકુમાર ગુપ્તા દ્વારા ખોટા નામે બીલો બનાવી અને જે ચેક રજૂ કરવામાં આવ્યા હતા તેમાં કંપનીનું ખોટું નામ લખી અને નરોડા ખાતે આવેલી બેંકમાં તેમના પિતાજીના બેંક એકાઉન્ટમાં ટુકડે ટુકડે 78.77 લાખ રૂપિયા ટ્રાન્સફર કર્યા હતા. આ સમગ્ર મામલે કંપનીના એસોસેટ વાઇસ પ્રેસિડેન્ટ દ્વારા બોડકદેવ પોલીસ સ્ટેશનમાં ફરિયાદ નોંધાવવામાં આવી છે.