છઠીયારડામાં શ્રી રામ સેવા સમિતિએ બાળકોને તિથિ ભોજન કરાવ્યું:પ્રાથમિક શાળા, હાઈસ્કૂલ અને આંગણવાડીના બાળકોને સ્વરુચી ભોજન અપાયું

છઠીયારડા ગામમાં શ્રી રામ સેવા સમિતિ (શ્રી તોતળ માતા મિત્ર મંડળ) દ્વારા પ્રાથમિક કુમાર શાળા, કન્યા શાળા, હાઈસ્કૂલ અને આંગણવાડીના બાળકો માટે તિથિ ભોજનનું આયોજન કરાયું હતું. શ્રી તોતળ માતા મંદિર ખાતે યોજાયેલા આ કાર્યક્રમમાં બાળકોને પ્રેમથી ભોજન કરાવવામાં આવ્યું. આ સાથે નાના બાળકોને બોલપેન પણ ભેટમાં અપાઈ હતી. આ ભોજન કાર્યક્રમથી બાળકોના ચહેરા પર ખુશી અને ઉત્સાહ જોવા મળ્યો હતો. બાળકો પ્રત્યેની આ લાગણી, સામાજિક જવાબદારી અને સેવાભાવનાનું ઉદાહરણ સૌ માટે પ્રેરણારૂપ બન્યું હતું. આ પ્રસંગે ત્રણેય શૈક્ષણિક સંસ્થાઓના આચાર્યોએ શ્રી રામ સેવા સમિતિ (શ્રી તોતળ માતા મિત્ર મંડળ) અને ભોજનના દાતાઓનો આભાર માન્યો. તેમણે આ સેવાકાર્યને બિરદાવ્યું હતું. બાળકો માટે તિથિ ભોજનનું આયોજન કરી સમાજસેવાની ઉત્તમ ભાવના દર્શાવવા બદલ દાતાઓને અભિનંદન પણ પાઠવવામાં આવ્યા. આ સેવાકીય કાર્યક્રમમાં શાળાના શિક્ષકો, આંગણવાડી કાર્યકરો, સંસ્થાના આગેવાનો અને સેવાભાવી સભ્યો હાજર રહ્યા હતા. સમગ્ર આયોજન ખુશનુમા અને ઉત્સાહપૂર્ણ વાતાવરણમાં પૂરું થયું.