ભરૂચમાં ગાજવીજ સાથે ધોધમાર વરસાદથી અનેક વિસ્તારો પાણીમાં ગરકાવ:કસક ગરનાળામાં વાહનવ્યવહાર પર અસર, લોકોને અવરજવરમાં મુશ્કેલી પડી;પાણી નિકાલની વ્યવસ્થા પર ઉઠ્યા પ્રશ્નો

ભરૂચ શહેરમાં આજે સાંજના સમયે લાંબા વિરામ બાદ ગાજવીજ સાથે પધારેલા ધોધમાર વરસાદે સમગ્ર શહેરને જળબંબાકાર કરી મૂક્યું હતું. ભારે વરસાદના કારણે શહેરના નીચાણવાળા વિસ્તારો તેમજ મુખ્ય માર્ગો પર પાણી ફરી વળતાં વાહનચાલકો અને રાહદારીઓને ભારે મુશ્કેલીનો સામનો કરવો પડ્યો હતો. કસક ગરનાળામાં પાણી ભરાતાં વાહનવ્યવહાર પ્રભાવિત શહેરના કસક ગરનાળા વિસ્તારમાં વરસાદી પાણીનું સ્તર વધતાં પરિસ્થિતિ વણસી હતી. ગરનાળામાં પાણી ભરાઈ જવાના કારણે વાહનચાલકોને જીવના જોખમે પાણીમાંથી પસાર થવાની નોબત આવી હતી, જેના પગલે કસક ગરનાળા અને આસપાસના રસ્તાઓ પર વાહનવ્યવહાર પર માઠી અસર પહોંચી હતી. પાણીના નિકાલની વ્યવસ્થા સામે ઉઠ્યા પ્રશ્નો અચાનક શરૂ થયેલા મુસળધાર વરસાદથી સમગ્ર શહેરના જનજીવન પર અસર પડી હતી અને નાગરિકોને અવરજવર કરવામાં હાલાકી ભોગવવી પડી હતી. લાંબા સમયના વિરામ બાદ પડેલા પ્રથમ મુખ્ય વરસાદમાં જ રસ્તાઓ પર પાણી ભરાઈ જતાં સ્થાનિક તંત્ર દ્વારા કરવામાં આવતી વરસાદી પાણીના નિકાલની કામગીરી અને દાવાઓ સામે શહેરીજનોમાં ફરી એકવાર ગંભીર સવાલો ઊભા થયા છે.