પાટણના બગવાડામાં 5 દિવસથી ભૂવો પડ્યો:સમારકામ ન થતાં કોંગ્રેસે પાલિકા સામે વિરોધ નોંધાવ્યો, નબળી એજન્સીને કામ આપવાનો આક્ષેપ

પાટણ શહેરના બગવાડા વિસ્તારમાં છેલ્લા 5 દિવસથી ભૂવો પડ્યો છે. જોકે, તેનું સમારકામ ન થતાં શહેર કોંગ્રેસે નગરપાલિકા તંત્ર સામે વિરોધ પ્રદર્શન કર્યું હતું. આ માટે આજે આક્રોશ કાર્યક્રમ યોજવામાં આવ્યો હતો. પાટણ શહેરમાં છેલ્લા 4 મહિનાથી ભૂગર્ભ ગટર ઉભરાવાની અને ભૂવા પડવાની સમસ્યાઓ વધી ગઈ છે. બગવાડાથી સુભાષ ચોક તરફ જતો રસ્તો શહેરની મુખ્ય બજાર ગણાય છે. આ રસ્તા પર 5 દિવસથી ભૂગર્ભ ગટરનો મોટો ભૂવો પડ્યો છે. આ માર્ગ પરથી શાળાએ જતા બાળકો, રિક્ષાઓ અને ST બસો સહિતનો વાહન વ્યવહાર સતત પસાર થાય છે. તેમ છતાં નગરપાલિકા તંત્ર આ કામગીરી પર ધ્યાન આપી રહ્યું નથી. કોંગ્રેસે આરોપ લગાવ્યો છે કે, નગરપાલિકાએ ભૂગર્ભ ગટરના કામ માટે યોગ્યતા તપાસ્યા વગર જ એક નબળી એજન્સીને ટેન્ડર આપી દીધું છે. કામનો ઓર્ડર આપ્યાના 5 દિવસ વીતી ગયા હોવા છતાં એજન્સીએ કામ શરૂ કર્યું નથી. ત્યાં કોઈ મજૂરો પણ હાજર નથી. આ પરિસ્થિતિના વિરોધમાં પાટણ શહેર કોંગ્રેસ પ્રમુખ અને નગરપાલિકા સદસ્યની આગેવાની હેઠળ કાર્યકરોએ વિરોધ પ્રદર્શન કર્યું હતું. તેમણે બેનરો સાથે ભાજપના ઊંધા ઝંડા ફરકાવ્યા. નગરપાલિકાના વહીવટકર્તાઓ અને સત્તાધીશો સામે આક્રોશ વ્યક્ત કરવામાં આવ્યો. કોંગ્રેસે ભૂગર્ભ ગટરની સમસ્યાનું તાત્કાલિક નિવારણ લાવવાની માંગ કરી છે.