હળવદથી 6 લાખના દાડમ ભરેલી ટ્રક ગાયબ:ગોરખપુર પહોંચાડવાના 12 ટન દાડમનો જથ્થો રસ્તામાંથી જ ગુમ, માલિક-ચાલકે ફોન બંધ કર્યા

હળવદથી ઉત્તર પ્રદેશના ગોરખપુર મોકલાયેલા 6 લાખ રૂપિયાના 12 ટન દાડમનો જથ્થો રસ્તામાંથી જ ગાયબ થઈ ગયો છે. આ ઘટનાથી વેપારીઓમાં ચર્ચા જાગી છે. ઓનલાઈન ટ્રાન્સપોર્ટ એપ્લિકેશન દ્વારા ભાડે રાખેલી ટ્રકના માલિક અને ચાલકે દાડમનો જથ્થો નક્કી કરેલી જગ્યાએ પહોંચાડ્યો નથી, તેવો આરોપ છે. આ મામલે કચ્છ જિલ્લાના ભુજમાં રહેતા ટ્રાન્સપોર્ટના વેપારી બલ્કારસિંગ ગુરૂમુખસિંગ ભટ્ટી (ઉંમર 50)એ હળવદ તાલુકા પોલીસ સ્ટેશનમાં ફરિયાદ નોંધાવી છે. તેમણે પવન કુમાર વિનોદકુમાર બાજપાઈ અને ટ્રક ચાલક મુકેશભાઈ વિરુદ્ધ ફરિયાદ કરી છે. ફરિયાદમાં જણાવ્યા મુજબ, 6 લાખ રૂપિયાના 12 ટન દાડમ પવન કુમાર વિનોદકુમાર બાજપાઈની ટ્રક (નંબર UP-78-JN-5955)માં ભરવામાં આવ્યા હતા. આ દાડમનો જથ્થો ઉત્તર પ્રદેશના ગોરખપુરના સીકીગંજમાં આવેલી રેઇન ફ્રુટ કંપનીમાં પહોંચાડવાનો હતો. પરંતુ ટ્રક ચાલક અને ટ્રાન્સપોર્ટરે દાડમનો જથ્થો નક્કી કરેલી જગ્યાએ પહોંચાડ્યો નહીં. પછી બંનેએ પોતાના ફોન બંધ કરી દીધા. આથી ફરિયાદીએ વિશ્વાસઘાત અને છેતરપિંડીની ફરિયાદ નોંધાવી છે. હળવદ પોલીસે ફરિયાદના આધારે આરોપીઓ સામે ગુનો દાખલ કર્યો છે. પોલીસે દાડમનો જથ્થો ક્યાં ગયો, ટ્રક ક્યાં છે અને આ ઘટનામાં બીજા કોઈની સંડોવણી છે કે કેમ, તે અંગે વધુ તપાસ શરૂ કરી છે.