મહીસાગર પોલીસે સાતકુંડામાં કર્યું મહા સ્વચ્છતા અભિયાન:જિલ્લા પોલીસ વડા સફિન હસનની આગેવાનીમાં 'સેવા સંકલ્પ અભિયાન' હેઠળ શ્રમદાન

મહીસાગર જિલ્લા પોલીસે રાજ્યવ્યાપી 'સેવા સંકલ્પ અભિયાન' હેઠળ એક મોટું સ્વચ્છતા અભિયાન ચલાવ્યું. આ અભિયાન મહીસાગર જિલ્લાના જાણીતા પ્રવાસન સ્થળ સાતકુંડા, ગોધર ખાતે યોજાયું હતું. પોલીસે પર્યાવરણની સુરક્ષા અને સ્વચ્છતા માટે શ્રમદાન કર્યું. આ સ્વચ્છતા કાર્યક્રમમાં મહીસાગર જિલ્લા પોલીસ વડા સફિન હસન હાજર રહ્યા હતા. તેમની સાથે જિલ્લા નાયબ પોલીસ અધિક્ષક જે. જી. ચાવડા અને જી. એલ. ચૌધરી પણ જોડાયા હતા. જિલ્લાના તમામ પોલીસ અધિકારીઓ અને મોટી સંખ્યામાં પોલીસકર્મીઓ પણ આ અભિયાનમાં સામેલ થયા. પોલીસકર્મીઓ ઉપરાંત, સ્થાનિક ગ્રામજનો અને યુવાનો પણ મોટા પ્રમાણમાં આ સ્વચ્છતા અભિયાનમાં ઉત્સાહભેર જોડાયા હતા. આનાથી લોકભાગીદારીનું એક સારું ઉદાહરણ જોવા મળ્યું અને સૌના સહયોગથી આ કાર્યક્રમ સફળ રહ્યો. આ પ્રસંગે મહીસાગર પોલીસે નાગરિકોને એક સકારાત્મક સંદેશ પણ આપ્યો. પોલીસે કહ્યું કે, 'આપણે સૌ આપણા આસપાસના વિસ્તારને સ્વચ્છ રાખીને 'સ્વચ્છ ભારત, સ્વસ્થ ભારત'ના સપનાને સાકાર કરવામાં મદદ કરીએ.'