નવસારીના જલાલપોરમાં ત્રિદિવસીય સત્સંગ પારાયણ યોજાઈ:પૂજ્ય કમલનયન સ્વામીએ ભગવાન સ્વામિનારાયણના લીલા ચરિત્રો વર્ણવી કથાનો લાભ આપ્યો

નવસારીના જલાલપોરમાં આવેલા સ્વામિનારાયણ મંદિરમાં ત્રિદિવસીય સત્સંગ પારાયણનું આયોજન કરવામાં આવ્યું હતું. પવિત્ર ચાતુર્માસ અને શ્રાવણ માસના અંતિમ દિવસોમાં મહંત સ્વામી મહારાજની પ્રેરણાથી બીએપીએસ મંદિર દ્વારા આ કથા યોજાઈ હતી. બીએપીએસસંસ્થાના વિદ્વાન સંત પૂજ્ય કમલનયન સ્વામીએ ભગવાન સ્વામિનારાયણના દિવ્ય ચરિત્રો પર કથાનો લાભ આપ્યો. પૂજ્ય કમલનયન સ્વામીએ જણાવ્યું કે ફક્ત ધ્યાન કરવાથી, માળા ફેરવવાથી કે તપ કરવાથી મન શાંત થતું નથી. જ્યારે ભગવાનના દિવ્ય ચરિત્રો શ્રદ્ધા, વિશ્વાસ અને ભક્તિભાવથી સાંભળવામાં આવે છે, ત્યારે મન શાંતિ અનુભવે છે. તેમણે કહ્યું કે સંસારમાં સાચી શાંતિ ભગવાન અને તેમના ગુણાતીત સંતના ગુણો ગાવાથી જ મળે છે.તેમણે વધુમાં કહ્યું કે, વર્તમાન સમયમાં પરમ પૂજ્ય મહંત સ્વામી મહારાજ જેવા પવિત્ર સંતના કાર્યો અને તેમના દર્શનથી પણ મનુષ્યને શાંતિ મળે છે. કથાના અંતિમ દિવસે તમામ હરિભક્તોએ સંતોને વસ્ત્રદાન કર્યું. ત્યારબાદ ભગવાનની આરતી કરીને આ ત્રિદિવસીય સત્સંગ પારાયણની પૂર્ણાહુતિ કરવામાં આવી.