વલસાડ કોલેજમાં એનર્જી ઓડિટીંગ પર વ્યાખ્યાન:મિકેનિકલ-ઇલેક્ટ્રિકલના વિદ્યાર્થીઓ માટે 'ઈન્ડસ્ટ્રીયલ એનર્જી ઓડિટીંગ એન્ડ એફિશિયન્સી પ્રેક્ટિસિસ' વિષય પર નિષ્ણાત વ્યાખ્યાન

વલસાડની સરકારી ઇજનેરી કોલેજના મિકેનિકલ એન્જિનિયરિંગ વિભાગે 5મા સેમેસ્ટરના મિકેનિકલ અને ઇલેક્ટ્રિકલ એન્જિનિયરિંગના વિદ્યાર્થીઓ માટે એક નિષ્ણાત વ્યાખ્યાનનું આયોજન કર્યું હતું. આ વ્યાખ્યાન 'ઈન્ડસ્ટ્રીયલ એનર્જી ઓડિટીંગ એન્ડ એફિશિયન્સી પ્રેક્ટિસિસ' વિષય પર હતું. આ કાર્યક્રમમાં મંત્રા (MANTRA), સુરતના એનર્જી કન્ઝર્વેશન સેલના વડા એન્જિનિયર ભાવદીપ શાહ મુખ્ય વક્તા તરીકે હાજર રહ્યા હતા. તેમણે વિદ્યાર્થીઓને ઔદ્યોગિક ઉર્જા બચત, બોઈલર અને થર્મલ સિસ્ટમ્સમાં ઉર્જા કાર્યક્ષમતા વધારવાના ઉપાયો વિશે સમજાવ્યું. સાથે જ, 'બ્યુરો ઓફ એનર્જી એફિશિયન્સી' (BEE) દ્વારા પ્રમાણિત એનર્જી ઓડિટર બનવા માટેની કારકિર્દીની તકો વિશે પણ વિગતવાર જાણકારી આપી. સેશન દરમિયાન વિદ્યાર્થીઓને 'યોકોગાવા CW240 પાવર એનાલાઈઝર' (Yokogawa CW240 Clamp-On Power Analyzer) સાધન દ્વારા 3-ફેઝ સિસ્ટમમાં પાવર ક્વોલિટી અને વોલ્ટેજ-કરંટના રીઅલ-ટાઇમ લાઈવ મેઝરમેન્ટનું પ્રાયોગિક નિદર્શન પણ કરાવાયું હતું. આ કાર્યક્રમમાં 50થી વધુ વિદ્યાર્થીઓએ ઉત્સાહથી ભાગ લીધો હતો. આ સમગ્ર કાર્યક્રમનું આયોજન મિકેનિકલ એન્જિનિયરિંગ વિભાગના ડૉ. હિતેશ કિશોરભાઈ સોલંકી દ્વારા કરાયું હતું. સંસ્થાના આચાર્ય અને વિભાગીય વડા ડૉ. વી.ડી. ધીમને આ સફળ આયોજન બદલ આયોજક અને સમગ્ર ટીમને અભિનંદન આપ્યા હતા.