નર્મદાની ગૃહિણી જયાબેન બની સફળ ઉદ્યોગ સાહસિક‎:સ્થાનિક કેળામાંથી વેફર્સ બનાવવાનો ગૃહઉદ્યોગ શરૂ કર્યો, હવે દર મહિને આશરે 15થી 18 હજારની કમાણી

નર્મદા જિલ્લાના નાંદોદ તાલુકાના વાવડી ગામના શ્રીમતી જયાબેન કમલેશ વસાવાની કહાની એ વાતનો જીવંત પુરાવો છે કે, જો યોગ્ય તક અને પ્લેટફોર્મ મળે તો ઘર સંભાળતી સામાન્ય મહિલા પણ એક સફળ ઉદ્યોગ સાહસિક બની શકે છે. એક સામાન્ય ગૃહિણી તરીકે પરિવારની જવાબદારીઓ નિભાવતા જયાબેનના મનમાં કંઈક પોતાનું કરવાની તમન્ના હતી, પરંતુ મૂડી, યોગ્ય માર્ગદર્શન અને બજારની સમજ ન હોવાને કારણે તેમની આ ઈચ્છા માત્ર એક સપનું બની રહી હતી. જોકે, સરકારની મિશન મંગલમ યોજના હેઠળ ‘સાંઈ મિશન મંગલમ જૂથ’ સાથે જોડાવાની તક તેમના જીવનનો સૌથી મોટો ટર્નિંગ પોઈન્ટ સાબિત થઈ. જૂથ સાથે જોડાયા બાદ યોગ્ય તાલીમ, સરકારી ધિરાણ અને જૂથની અન્ય બહેનોના પ્રોત્સાહનથી જયાબેને નર્મદા જિલ્લામાં મોટા પાયે થતા સ્થાનિક કેળાના ઉત્પાદનને જ પોતાની રોજગારીનું સાધન બનાવવાનું નક્કી કર્યું. તેમણે કેળાની વેફર્સ બનાવવાનો ગૃહઉદ્યોગ શરૂ કર્યો. શરૂઆત ખૂબ જ નાના પાયે થઈ હતી, પરંતુ તેમની મહેનત, વેફર્સની ઉત્તમ ગુણવત્તા અને સ્વાદને કારણે બજારમાં તેની માંગ સતત વધતી ગઈ. જયાબેન દરરોજ 10થી 15 કિલો જેટલી કેળાની સ્વાદિષ્ટ વેફર્સનું ઉત્પાદન કરે છે. આ વેફર્સનું વેચાણ તેઓ પોતાના સ્થાનિક ગામ ઉપરાંત નજીકના મુખ્ય મથક રાજપીપળાના બજારોમાં પણ કરી રહ્યા છે. આ નાના ગૃહઉદ્યોગ થકી તેઓ આજે દર મહિને આશરે 15થી 18 હજાર સુધીની ગૌરવપૂર્ણ આવક મેળવી રહ્યા છે.