ભુજમાં પાર્સલથી મંગાવેલો 53 હજારનો વિદેશી દારૂ ઝડપાયો:LCBએ એક શખ્સ સામે ગુનો નોંધી વધુ તપાસ હાથ ધરી

ભુજ શહેરમાં ગેરકાયદેસર દારૂની હેરાફેરી સામે પશ્ચિમ કચ્છ લોકલ ક્રાઇમ બ્રાન્ચ (LCB) એ કાર્યવાહી કરી છે. પોલીસે ભુજ શહેર બી ડિવિઝન પોલીસ સ્ટેશન વિસ્તારમાંથી 53,110 રૂપિયાનો ભારતીય બનાવટનો વિદેશી દારૂનો જથ્થો જપ્ત કર્યો છે. આ કેસમાં એક શખ્સ સામે ગુનો નોંધવામાં આવ્યો છે. મળતી માહિતી પ્રમાણે, પશ્ચિમ કચ્છ-ભુજ LCB નો સ્ટાફ ભુજ તાલુકા વિસ્તારમાં પેટ્રોલિંગ કરી રહ્યો હતો. તે દરમિયાન પોલીસને ખાનગી બાતમી મળી હતી કે, ભુજના કેમ્પ એરિયામાં અમીત કોમ્પલેક્ષ પાછળ રહેતો વિરેન્દ્ર અરવીદ ભીલ ઉર્ફે રાઠોડ રાજ્ય બહારથી પાર્સલ અને ટ્રાન્સપોર્ટ મારફતે વિદેશી દારૂ મંગાવી રહ્યો છે. આ બાતમી મળતા LCB ટીમે તેની ચકાસણી કરીને કાર્યવાહી કરી હતી. તપાસ દરમિયાન અમીત કોમ્પલેક્ષની પાછળ આવેલા કેમ્પ એરિયા ખાતે દારૂનો જથ્થો મળી આવ્યો હતો. પોલીસે ઘટના સ્થળેથી ભારતીય બનાવટની વિદેશી દારૂની કુલ 94 બોટલ જપ્ત કરી હતી, જેની અંદાજિત કિંમત 53,110 રૂપિયા છે. પોલીસ તપાસમાં સામે આવ્યું કે દારૂનો આ જથ્થો ટ્રાન્સપોર્ટ મારફતે રાજ્ય બહારથી મંગાવવામાં આવ્યો હતો. આ જથ્થો ઘર સુધી પહોંચાડવા માટે જીજે-12-બીયુ-8851 નંબરની લોડિંગ રિક્ષા ભાડે કરવામાં આવી હોવાની માહિતી પણ પોલીસને મળી હતી. સમગ્ર મામલે પોલીસે દારૂનો મુદ્દામાલ જપ્ત કરી આગળની કાયદેસરની કાર્યવાહી કરી છે. આ કેસમાં વિરેન્દ્ર અરવીદ ભીલ ઉર્ફે રાઠોડ સામે ગુજરાત પ્રોહિબિશન એક્ટની કલમ 65(એ)(ઈ) હેઠળ ગુનો નોંધાયો છે. જપ્ત કરાયેલ તમામ મુદ્દામાલ ભુજ શહેર બી ડિવિઝન પોલીસ સ્ટેશનને સોંપવામાં આવ્યો છે.